Imoto yohlobo lweDatsun Go abasolwa abebehamba ngayo ngesikhathi bezama ukubalekela ukukhokha uphethiloli.

AMAPHOYISA kaMasipala naweSouth African Police Service abophe umsolwa wesilisa nababili abehamba nabo ngemuva kokuthi begcwalise uphethiloli emotweni yabo base bezama ukubaleka bengakhokhile. Laba basolwa abathathu, okusolakala ukuthi bangabaseWentworth, baboshwe ngemuva kokujahwa ngamaphoyisa kaMasipala. 

Okhulumela amaphoyisa kaMasipala uNsumpa Omkhulu uBoysie Zungu uthe amaphoyisa abophe abasolwa abebehamba
ngemoto yohlobo lweDatsun Go ebhaliswe kwenye yezinkampani yezimoto ezithutha umphakathi abagibeli abazibiza nge-app. “Lezi zinhlelo zokusebenza zenzelwe ukusiza abagibeli ukuthi bafinyelele kalula lapho beya khona kodwa izigebengu kwesinye isikhathi zizisebenzisa ukwenza ubugebengu obuhlanganisa nokugebenga abantu,” usho kanje.

UZungu ugqugquzele abagibeli abasebenzisa lezi zinhlelo ukuthi baqinisekise imininingwane yomshayeli futhi bazise othile ngemininingwane yohambo ukuze baqinisekise ukuphepha kwabo.